O Concello de Dodro rematou a semana pasada informando dunha importante novidade para a cidadanía: a plena operatividade do caixeiro automático no Consistorio, un equipamento co que compensar á veciñanza da ausencia de servizos bancarios no termo municipal, un proceso que afectou a unha chea de localidades da nosa comarca (agravado pola pandemia e pola teima das entidades bancarias de envorcar esforzos na operatividade electrónica de xeito unilateral) e que en Dodro remóntase a hai case unha década.
Neste senso, a instalación do caixeiro foi posíbel grazas ás xestións iniciadas pola Xunta e Abanca en colaboración cos concellos galegos nos que xa non viña sendo posíbel realizar trámites e operacións in situ, entre os que se atopaba Dodro. O concello, como lembraremos, quedou sen esta cobertura bancaria en xuño de 2013, cando Caixa Galicia (hoxe Abanca) decidiu botar o peche á súa sucursal e ao caixeiro que tiña no termo municipal. Agora, nove anos despois a cidadanía de Dodro recupera en parte (só a parte mecánica e electrónica, non a presencial) un servizo que nunca debeu perder. Deste xeito, preténdese que unha parte da poboación (a que é cliente de Abanca) non se vexa obrigada a desprazarse até Padrón, Rois, Pontecesures ou mesmo Rianxo para as súas xestións. O novo servizo é produto das negociacións levadas a cabo polo alcalde Xabier Castro coa Xunta e máis con Abanca.
