M. A. – Tarde histórica para o Rotogal Boiro Voleibol, que superou por primeira vez en Superliga ao Teruel (0-3) e, ademais, logrou o billete para o play off polo título, tamén por vez primeira, cando aínda lle restan por disputar cinco partidos da fase regular. Os da Cachada realizaron un encontro solvente no Pavillón Los Planos e non desaproveitaron a ocasión para achegarse á sétima praza ante un conxunto aragonés que tivo que reinventarse debido ás baixas como a do oposto Villena.
O Rotogal Boiro Voleibol entrou un pouco frío á cancha e algúns erros propiciaron que o Teruel se lle escapase no arranque (7-2). No entanto, unha vez que os visitantes melloraron na recepción, o choque foise igualando. Posteriormente, unha serie positiva no saque de Gaby del Carmen achandou o camiño para que os de Marcelo Benavídez se anotasen a primeira manga (23-25).
O segundo set mantívose igualado. Con todo, os erros en defensa lastraron a un Rotogal Boiro Voleibol que se viu a rebufo ata que se alcanzou o tramo decisivo (20-18). Entón, o servizo de Felipe Benavídez, que conseguiu dous aces e castigou a recepción dos turolenses, brindou o segundo parcial para o conxunto galego (22-25). O terceiro set caracterizouse por unhas excelentes prestacións dos dous equipos no saque, circunstancia que propiciou que ambos os rivais sufrisen na recepción. Unha vez máis, a igualdade foi a tónica predominante ata que, no desenlace, o Rotogal Boiro Voleibol elevou o rendemento defensivo e forzou un erro no ataque do Teruel para sentenciar pola vía rápida (22-25).
Teruel, 0: Pablo Bugallo, Jukoski, Petty, Kobzev, Dimitrov, Gámiz e Vidasola (líbero). Tamén xogaron Ereu, Igual, Jovanovic e Monteagudo.
Rotogal Boiro Voleibol, 3: Gaby del Carmen, José García, José Carlos Romero, Felipe Benavídez,
Renan Levandoski, Gaspar Bitar e Adrián Alves (líbero). Tamén xogaron Alan Davila, Martín
Casais e Ismael Martínez.
Sets: 0-1 (23-25), 0-2 (22-25) y 0-3 (22-25).
Árbitros: José Luis Arrarte e Fernando Cerrato.
Incidencias: Partido disputado no Pavillón Los Planos ante uns 400 espectadores.
