Miguel Álvarez.- O Pavillón dos Pajaritos será escenario este sábado 5 de febreiro, ás 19.30 horas, do regreso á actividade do Rotogal Boiro Voleibol na Superliga. Foron necesarios 49 días para que os da Cachada volvan competir. E o rival é o Río Duero Soria, un conxunto que ocupa a cuarta posición da táboa, pero que vén de sufrir un contundente revés na pista do Melilla Sport Capital (3 0). En principio, todos os xogadores do conxunto boirense estarán dispoñíbeis para retomar o campionato.
Unha das incógnitas do duelo deste sábado é coñecer como afectará un parón tan prolongado aos de Marcelo Chino Benavídez. De feito, o Rotogal Boiro Voleibol disputou catro partidos menos que o Río Duero Soria na presente edición da Superliga, co que isto podería afectar o ritmo de competición. Aínda que, no plano puramente estatístico, os casteláns son un rival que, até a data, déuselle ben aos da Cachada, que os superou tanto nos dous encontros da pasada tempada (3-2 e 1 3) como no mes de novembro (3-2).
O Río Duero Soria asentouse na zona alta da táboa na presente edición da Superliga.
O oposto Álvaro Gimeno é un dos estandartes dun conxunto no que tamén están a destacar o colocador Xavi Folguera e o receptor José Villalba.
Precedentes
Tempada 2021-2022
Rotogal Boiro Voleibol, 3-Soria, 2
Tempada 2020-2021
Soria, 1-Rotogal Boiro Voleibol, 3
Rotogal Boiro Voleibol, 3-Soria, 2
