O Concello de Boiro vén de executar obras de pavimentado no rueiro na contorna da coñecida como praza do Lorcho en Cabo de Cruz. Esta actuación forma parte dun proxecto para a reparación e mellora de beirarrúas e pavimentos que conta co financiamento da Deputación da Coruña a través do Plan Único (POS).
A actuación que se levou a cabo en Cabo de Cruz consistiu na reparación dunha pequena rúa do casco vello, duns 50 metros de lonxitude e 1.5 metros de ancho, na que se renovou o servizo de auga para consumo e de recollida de pluviais. O alcalde, José Ramón Romero, e o concelleiro de Urbanismo e Obras, Luis Ruiz, visitaron este 27 de xaneiro o lugar para coñecer o resultado da obra.
“O obxectivo desta actuación foi prestar un mellor servizo ás persoas maiores que viven no rueiro. O que buscamos con estas pequenas actuacións é mellorar os servizos dos núcleos de poboación do rural”, afirmou o alcalde. Xunto con esta actuación o Concello de Boiro actuou en outros puntos de núcleos importantes de poboación como nun tramo de beirarrúas en Goiáns, ou o pavimentado da rúa Nova.
