Finalmente o vento non fixo acto de presenza na primeira xornada da Liga de Cruceiros. Despois dunha espera de máis de dúas horas nas inmediacións do porto pobrense, sede do Club Náutico Arousa Norte, o comité de regatas decidiu suspender esta primeira etapa pola ausencia case total de vento. A segunda etapa disputarase o sábado 29 con saída en Vilagarcía.
Ás 13:30, hora prevista para a saída, o comité de regatas anunciaba un adiamento indefinido ata que se desen as condicións para dar a saída á vintena de embarcacións inscritas para esta primeira manga da Liga de Cruceiros Ría de Arousa 2022. A esa hora unha pequena brisa, duns 4 nós do nordeste, daba esperanza aos regatitas para a realización da proba, pero esa presión foi a menos e o esperado vento do sur que anunciaban os partes meteorolóxicos non deu chegado, circunstancia que levou ao comité a izar definitivamente o gallardete de intelixencia sobre Alfa, significativo de que non se celebraría a proba prevista para o día.
Como dixemos, a próxima manga será o sábado 29 baixo a organización do CN Vilagarcia, con saída prevista para as 13:30, onde as embarcacións inscritas realizarán un percorrido costeiro polo interior da ría de Arousa.
O cartel de favoritos preséntase moi amplo e variado, e calquera embarcación en liza pode levar as honras nunha liga que consiste en 6 probas con 1 descarte por embarcación, circunstancia que “abre aínda mais o abanico”, segundo informou o Club Náutico Arousa Norte.
