Co gallo dos 101 anos exactos do afundimento do vapor Santa Isabel, este domingo 2 de xaneiro de 2022 celebrarase a terceira edición da Milla Solidaria Heroínas de Sálvora. A proba, segundo confirmou este luns 20 o concelleiro de Deportes, Javier Sampredro, recupera a versión presencial logo de que a última convocatoria tivera lugar de xeito virtual.
Sampedro e a súa compañeira Juana Brión presentaron o certame xunto a psicóloga responsábel do centro da Asociación A Creba en Ribeira, Montse Vila, e puxeron o foco na vertente solidaria da actividade: a recadación ira destinada a este colectivo que traballa a prol da integración das persoas con problemas de saúde mental.
O percorrido da carreira terá lugar polo porto de Aguiño. Poderán participar atletas federados e non federados, habendo unha clasificación conxunta. A cita arrancará ás 11 da mañá coa categoría biberóns para dar paso a continuación ao resto de categorías inferiores e á milla zapatilla inclusiva antes de dar paso, ás 12.45 horas, á categoría absoluta cunha distancia de 1.609 metros.
As inscricións débense formalizar na páxina galitiming.com. O custe é de 5 euros para as categorías a partir de sub-14 para arriba, mentres que nas inferiores a competición é gratuíta.
Haberá premios para os tres primeiros clasificados e clasificadas de cada milla, agás nas probas de biberóns e prebenxamín, e sub 10-sub 12 nas que os corredores recibirán unha medalla.
Cómpre lembrar que na primeira edición participaron preto de 180 corredores en tanto que na segunda, virtual, foron 119 os asistentes.
