O Concello de Outes vén de presentar un novo roteiro de sendeirismo que reforza a súa oferta de turismo de natureza. O roterio ofrece a posibilidade de coñecer a zona interior do concello xa que as protagonistas son as parroquias de San Lourenzo, Valadares e Outes. Presenta un percorrido circular de 23,5 km que nos permitirá gozar dun itinerario de grande interese natural e cultural, coa carballeira e as fervenzas de San Paio e os Gliptógrifos da Carballa como puntos máis atractivos. O roteiro iníciase na propia Serra de Outes para seguir o curso do río Tins por unha contorna natural espectacular ate chegar a parroquia de San Lourenzo, onde se poderán visitar os vestixios da Torre dos Mouros e a Igrexa de San Lorenzo de Matasueiro. Logo ascéndese cara o lugar de Gosende, na parroquia de Valadares, a través da paisaxe debuxada pola carballeira de San Paio, tras pasar pola capela homónima e visitar as fervenzas, tomando un desvío de 500 metros. Desde Gosende continuamos cara Valadares, onde pasaremos pola Igrexa de San Miguel de Valadares. Desde aquí, o trazado transcorre por paisaxes agrogandeiras das terras altas de Outes cara o espazo arqueolóxico dos Gliptógrifos da Carballa, con vistas ao val de Carleo, conformado polo río Bendimón. Desde os gliptógrifos, atravesa o val para ascender desde Carleo de Abaixo aos montes da Vaqueira e descender cara Cambeiro de Arriba, uníndonos co trazado do Camiño de Santiago da Ría de Muros-Noia cara a Serra de Outes.
Este novo roteiro que se pon en funcionamento dende o Concello de Outes pretende dar continuidade á planificación que se ven realizando nos últimos dous anos, nos que se puxeron en marcha os roteiros do Tremuzo, o do Tambre e o dos Carpinteiros cos Pes Mollados. O roteiro é apto para practicar sendeirismo aínda que tamén se pode realizar en bicicleta na súa totalidade. Pódese atopar máis información sobre a oferta de roteiros do concelo na páxina web de turismo: https://turismo.outes.gal/
A sinalización deste novo roteiro contou co apoio da Axencia de Turismo de Galicia, a través da liña de axudas para a mellora de infraestruturas turísticas.
