O Concello de Noia vén de culminar o proceso de legalización do Punto Limpo municipal, poñendo fin a unha situación administrativa que segundo lembrou o Goberno local, “víase arrastrando desde hai anos”.
A legalización constitúe “un paso importante para mellorar a xestión e garantir o correcto funcionamento deste servizo”, engadiu o Executivo, lembrando que xa en 2020, a Xunta de Galicia remitira unha comunicación ao Concello advertindo de que “a actividade de xestión de residuos domésticos desenvolvida no Punto Limpo estaba suxeita a autorización administrativa e que a instalación carecía da correspondente autorización”. Naquel apercibimento, sinalou o Concello, “indicábase expresamente que o exercicio desta actividade sen autorización constituía unha infracción grave, conforme á normativa vixente naquel momento, e podía levar aparelladas sancións de ata 300.000 euros”. O executivo recordou que a situación permaneceu “sen regularizar durante os seguintes anos”, mais foi o 1 de outubro de 2025 cando o novo Goberno municipal puxo en marcha os traballos necesarios para resolvela, encargando a unha empresa de enxeñaría especializada a tramitación técnica necesaria para conseguir a legalización do Punto Limpo.
O expediente foi coordinado polo tenente de alcalde, Manolo Seijas, e polo concelleiro de Medio Ambiente, Abel Pan, coa colaboración do persoal técnico de Secretaría, da Axente de Desenvolvemento Local e da empresa de enxeñaría encargada dos traballos.
Desde o Goberno municipal destacan “a complexidade dun expediente que requiriu numerosos trámites técnicos e administrativos, así como un importante traballo de coordinación durante os últimos meses”.
Seijas salientou que “desde 2020 existía unha advertencia expresa da Xunta e era necesario resolver unha situación que levaba anos pendente. Desde o inicio do novo Goberno puxémonos a traballar para regularizar o Punto Limpo e hoxe ese traballo dá os seus froitos”.
Unha vez resolta a situación administrativa, o Goberno municipal quere avanzar agora na mellora da xestión económica do servizo. Actualmente, o Punto Limpo supón para as arcas municipais un gasto de arredor de 180.000 euros anuais.
Durante o último ano, o Concello conseguiu reducir aproximadamente nun 20 % o custo da súa xestión, e o obxectivo é continuar avanzando nesta liña, “estudando novas fórmulas que permitan prestar o servizo con maiores garantías e dunha maneira máis eficiente”.
Para Seijas, “legalizar o Punto Limpo é un avance fundamental. Poñemos fin a unha situación irregular que se prolongou durante anos e abrimos unha nova etapa na que podemos centrarnos en mellorar a xestión, reducir o custo que supón para o Concello e conseguir un servizo máis eficiente para a veciñanza”.
