O deputado provincial de Cultura, Xurxo Couto, estivo este 1 de decembro en Boiro materializando liñas de traballo conxunto co Concello. Fíxoo co gallo da súa participación nunha xornada sobre cultura e sustentabilidade organizada pola entidade provincial. Na súa estadía en Boiro aproveitou para coñecer de primeira man o Pazo-Torre de Goiáns e a súa contorna e, tamén, para analizar vindeiras colaboracións na compaña do alcalde, José Ramón Romero, e a concelleira de Cultura, María Outeiral.
Na visita estiveron tamén o concelleiro, Raúl Treus; o técnico de cultura do Concello de Boiro, Alberto García; o asesor de cultura da Deputación, Xavier Campos; e os representantes da Fundación RIA, Manuel Rodríguez e Adrián Capelo.
Durante a estadía en Goiáns tiveron oportunidade de coñecer as obras de rehabilitación do inmóbel principal do pazo e tamén os avances que se están a dar dende a Comisión de Avaliación e Planificación acerca do futuro deste importante tesouro arquitectónico e cultural do Barbanza.
Durante o encontro, a concelleira, María Outeiral, presentou ao deputado algunhas das iniciativas que o Concello de Boiro, a través da área de Cultura, quere desenvolver co obxectivo de contar co apoio provincial para levalas a cabo. “O traballo conxunto entre as administracións é moi importante para desenvolver proxectos comúns en materia cultural, polo que o apoio que sempre presta a Deputación da Coruña é fundamental para desenvolver actividades”, afirmou a concelleira de cultura, María Outeiral.
