Porto do Son está a celebrar esta semana, con diversas liñas de acción (algunhas aínda abertas), o Día da Eliminación da Violencia contra a Muller (25-N).
O programa elaborado polo Concello en colaboración con diversas entidades inclúe accións deportivas, como por exemplo a firme adhesión do evento deportivo Sen-Son 10 k ás reivindicacións contra a violencia de xénero (por exemplo lanzando unha camiseta específica contra o maltrato, que xa podemos ver nas redes), e accións de cariz máis institucional, como a participación do Concello no programa De Fronte da Deputación.
Ao devandito hai que engadir a publicación da Guía do Ben Querer (lanzada polo Concello para aprendermos a identificar as violencias nas parellas adolescentes e para “aprender a diferenciar o mal querer do ben querer”); a proxección na Casa da Cultura da curtametraxe As tres caídas de María Santiso (dirixida ao alumnado de 4º da ESO do IES de Porto do Son, e incluíndo un coloquio con Roberto Alvite de Melgo Cinema, produtor executivo, guionista, director e actor da obra); ou, tamén, as creacións artístico-reivindicativas das nenas e nenos da Escola de Nebra e do CEIP de Xuño, baixo o lema Somos iguais.
A maiores de todo o devandito, o Concello lanzou nas redes un manifesto contra pola igualdade e a violencia de xénero, e a Casa da Cultura acolleu os días pasados (o día 20) a representación da obra Invisibles, de Redrum Teatro (unha obra para todos os públicos que pon o foco na reivindicación e visualización das mulleres que sufriron a violencia).
O programa tamén abrangue actividades terapéuticas dirixidas a mulleres con diversidades funcionais e cognitivas (en colaboración coa Asociación Acadar).
