Logo da Asemblea Nacional na que Ana Pontón foi elixida de novo como Portavoz do Bloque Nacionalista Galego, a formación continúa coa renovación dos seus órganos de dirección a nivel comarcal e local.
Na Asemblea que tivo lugar este venres 19 de novembro a militancia nacionalista tomou por unanimidade a decisión de nomear a Soledad Agra Tuñas como a nova Responsable do BNG na comarca de Muros e Noia. Pola súa parte, a sonense Patricia Torrado Queiruga acadou a vice-responsabilidade da comarca.
O Consello Comarcal do BNG completouse con outras 10 persoas das distintas localidades que conforman a comarca (Porto do Son, Lousame, Noia, Outes, Muros e Mazaricos), así como con 8 suplencias. O proceso de renovación continuará coa elección das responsabilidades locais, que pasarán a completar o órgano executivo do BNG Muros – Noia.
Agra remarcou “a importancia de dar unha resposta conxunta ás problemáticas comúns dos seis concellos, levando a cabo políticas que solucionen os problemas do día a día da xente, e facendo presión para que se poñan en marcha proxectos que fagan medrar á nosa comarca”.
