Andaina Pro Saúde Mental está a organizar mesas informativas itinerantes para a prevención de suicidio, mesas que contan con financiamento da Consellería de Sanidade e o Servizo Galego de Saúde e que tamén terán presenza nos nosos concellos, concretamente en Rianxo e, moi preto do Barbanza, en Pontecesures. Forman parte do programa integral de Andaina PSM para a mellora na detección e intervención en risco de suicidio nas comarcas rurais de Ordes e Ulla-Sar.
O obxectivo é contribuír a mostrar a dita problemática, ofrecendo á sociedade información e ferramentas para a súa abordaxe. Máis polo miúdo, explican, “trátase de contrarrestar o tabú asociado ao suicidio ofrecendo datos sobre a súa incidencia e desmontando os mitos e prexuízos ao redor do mesmo”. Asemade, proporciónase información sobre os sinais de alarma e transmítense ás persoas afectadas e achegados/as as recomendacións oficiais para posibilitar un acompañamento emocional axeitado.
As mesas emprázanse en servizos sociais e centros de saúde de diferentes concellos das devanditas comarcas. Andaina PSM xa tivo presenza con estas mesas no Centro de Información á Muller, no Centro de Saúde e na Unidade de Saúde Mental do Concello de Ordes, así como no Centro de Saúde do Concello de Oroso e nos Servizos Sociais do Concello de Rois.
No mes de decembro, poderemos atopalas no Centro de Saúde de Cerceda o día 1, en Servizos Sociais de Pontecesures o día 2, e en Servizos Socias e Centro de Saúde de Rianxo o día 15, sempre en horario de mañá. A entidade ten previstas máis accións desta índole, incluídas charlas informativas dirixidas á poboación xeral, das que se fará difusión a través de redes sociais, entidades colaboradoras e anuncios na contorna.
