De entre todas as moitas e variadas iniciativas que se están a levar a cabo nos nosos concellos para combater a violencia de xénero, encadradas nas celebracións do 25-N, ten especial protagonismo a campaña De Fronte impulsada novamente pola Deputación da Coruña. Esta relevancia vén dada polo seu programa (variado, diverso e multitemático, chegando a incluír actividades tan innovadoras un Visual Thinking para a xuventude ou un Scape Room para traballar contra as agresións de xeito cooperativo) e, tamén, polo importante número de concellos e entidades que se adheriron á mesma: un total de 88 concellos e 59 entidades. Na listaxe de municipios atopamos todos os da nosa comarca: Boiro, Porto do Son, Ribeira, Rianxo, Carnota, A Pobra do Caramiñal, Lousame, Noia, Outes Muros e Dodro.
Trátase dunha campaña que comezou hai un par de semanas e terminará o 25 de novembro, no exterior da Biblioteca Provincial, na Coruña, cunha lectura colectiva de textos poéticos a cargo das poetas Charo Lópes, Nuria Vil e Lucía Aldao.
O obxectivo da iniciativa impulsada pola área de Igualdade que xestiona a deputada María Muíño é “apelar ao compromiso individual e colectivo para loitar contra a violencia machista”.
Propostas innovadoras
Entre as actividades incluídas atópase como dixemos un Scape Room, un xogo que pon o foco na poboación xuvenil e que se formula para que poidan participar varios grupos ao mesmo tempo e no mesmo espazo. Tanto o material como as normas do xogo responden a criterios de accesibilidade, igualdade, cooperación e sensibilidade cara a violencia de xénero. Os grupos terán que resolver un enigma arredor dunha situación de violencia machista a través de diferentes pistas espalladas polo espazo onde haberá que aplicar a lóxica, a rapidez e o traballo en equipo. Para a resolución do enigma contarase coa información recollida noutras actividades innovadoras do programa, os Visual Thinking, de xeito que “se reforcen as ideas máis importantes e se tome consciencia de que a solución, dado que é unha problemática social, debe ser abordada por todas e por todos”.
Rianxo, punto de encontro
O xoves 11 de novembro, dentro da campaña De Fronte á violencia de xénero da Deputación da Coruña, o Auditorio Municipal de Rianxo acolleu a xornada Violencias de xénero en mulleres maiores. Participaron Elena Molanes Piñeiro (directora do centro de emerxencia para mulleres vítimas de violencia de xénero) e Lara Fuentes Enjamio (técnica de FADEMUR-Galicia), contándose con Marián Fernández (xornalista) como moderadora. Na cita, organizada en colaboración co Concello, tamén interveu a deputada de Igualdade, María Muíño, lembrando que “nun país no que o envellecemento poboacional é moi alto e cunha poboación moi dispersa, non podemos calar ante a vulnerabilidade das mulleres maiores que sofren violencia machista”. E engadiu: “Hai estudos que demostran que un dos grupos máis vulnerábeis entre as vítimas de violencia machista é o das mulleres de máis idade e isto non é algo que poidamos calar, vivimos nun país cun envellecemento poboacional moi alto e cunha poboación moi dispersa, despoboamento do rural e problemas importantes de transporte, e que, segundo a diagnose de igualdade da Deputación, hai unha crecente feminización do envellecemento, con rendas e pensión moito máis baixas”.
María Muíño volveu incidir na súa intervención en que o obxectivo da campaña é contribuír a “pór freo á violencia machista e crear un amplo movemento social para crear conciencia de igualdade fronte ao feminicidio”. Así, a partires deste 15 de novembro, na web defronte.gal estarán dispoñibles os recursos para as actividades xuvenís de Visual Thinking e Scape Room, para traballar sobre tratamento e prevención da violencia de xénero de xeito colaborativo e en equipos. Tamén na web da campaña, entre os días 22 e 29 de novembro estará visíbel o espectáculo musical para público infantil Martiña soñadora.
O programa completarase co acto colectivo de lectura de textos poéticos o propio día 25 de novembro ás 12.00 h no exterior da Biblioteca Provincial da Coruña a cargo das poetas Charo Lópes, Nuria Vil e Lucía Aldao. Os textos serán compartidos previamente cos concellos adheridos á campaña para que, de xeito voluntario, poidan facer unha lectura simultánea nas súas rúas.
