O Concello de Boiro, a través do departamento de Cultura, inaugurou na mañá deste 12 de novembro dúas mostras sobre Castelao e a poeta Xela Arias que se poden visitar durante todo o mes de novembro e decembro. O alcalde, José Ramón Romero, acompañado do secretario xeral de Política Lingüística, Valentín García, foron os encargados de presentar os detalles das súas mostras habilitadas: a mostra Castelao e os irmáns da liberdade na Casa da Cultura e Xela Arias, Asinamos ser libres no Centro Social de Boiro.
A primeira proposta é un traballo de Xan Leira que realiza un percorrido pola traxectoria vital, artística e poética do rianxeiro Alfonso Daniel Rodríguez Castelao a través de testemuñas que coincidiron con el nas súas diversas etapas. “Castelao estivo moi vinculado a Martínez López, quen lle da nome a este edificio, polo que para Boiro é unha honra ter esta mostra na Casa da Cultura xa que nos permite, non so achegarnos á historia de Castelao, senón tamén á nosa propia historia”, afirmou o alcalde.
No Centro Social de Boiro inaugurouse a mostra Xela Arias. Asinamos ser libres. Trátase dunha exposición divulgativa sobre a vida e a obra da poeta de Sarria, á que se lle adicou este ano o Día das Letras Galegas, sendo a quinta muller homenaxeada nos 50 anos de celebración. A mostra, documentada cos textos de Chus Nogueira e as fotografías de Xulio Gil, toma o nome dunha autopoética da autora publicada en Faro de Vigo e leva o ano rotando polos concellos galegos.
As dúas mostras poden visitarse durante o mes de novembro.
Á inauguración da mostra sobre Castelao asistiu o alumando de cuarto da ESO do IES A Cachada, pero todos aqueles centros educativos ou grupos interesados en realizar visitas ás mostras, poden poñerse en contacto co departamento de Educación do Concello de Boiro a través do enderezo educacion@boiro.gal.
