O Rotogal Boiro Voleibol visita este sábado ás 19.30 horas ao Eivissa Ushuaïa, conxunto ao que precede na clasificación da Superliga. Os galegos comparecerán en terras baleares coa moral reforzada tras o triunfo conseguido a pasada fin de semana fronte ao Río Douro Soria por 3-2. Neste sentido, o técnico boirense Marcelo Chino Benavídez asegura non pensar “en ningún momento que Rotogal Boiro Voleibol vaia quedar fóra da Copa e o play off polo título”. E engade: “Estou convencido de que estamos entre o seis mellores equipos do campionato”.
O equipo da Cachada contará, en principio, con todos os seus efectivos para visitar ao Eivissa, un rival ao que o adestrador describe como “un equipo interesante ao que hai que respectar, como a todos. Os partidos hai que xogalos e veremos despois do partido que opinión teño”.
Despois de medirse nas primeiras xornadas con moitos dos equipos da zona alta, Benavídez lanza unha reflexión tras o triunfo cultivado contra o Río Douro Soria: “Sempre é importante gañar, porque deixa sensacións lindas e xera grandes cousas para pensar en medrar moito máis. Cando falamos de cinco favoritos, hai que ter en conta que contra Soria gañamos 3-2 e contra Teruel perdemos 2-3. Creo que estamos capacitados para competir contra calquera. Non hai cinco ou seis favoritos. Aos favoritos súmolles o Rotogal Boiro Voleibol e o Melilla. Creo que estamos moi ben e imos estar pelexando arriba na clasificación”.
