Se alguén non tiña en conta ao Unión para estar nos postos altos da táboa, xa pode cambiar de idea. Os de Asados voltaron a gañar desta vez ao Escravitude nun partido no que se mostraron superiores en todo momento. Xa no inicio Néstor asestou o primeiro golpe no minuto 11, e parecía que ía a rematar en goleada, pero os de Padrón non deron seu brazo a torcer. Cando se chegaba aos últimos 15 minutos de partido, chegou o tanto da tranquilidade, en propia porta de David González, que terminou de sentenciar o partido. Catro xornadas, tres vitorias e un empate, 8 goles a favor e 0 en contra, eses son os rexistros dun Unión que con este triunfo se sitúa no máis alto da táboa.
O Cidade de Ribeira segue sen arrancar, se ben non mereceu perder o partido contra o Cruces, tivo que suar sangue para conseguir un punto na casa. Comezou ben o Cidade con ataques polos costados, pero que rápido se foron apagando. Foi na segunda metade cando chegaron os catro goles. Adiantáronse os pontevedreses e Moreno moveu o banquiño. No minuto 65 Aguado levantaba a toda a Fieiteira cun auténtico golazo desde o medio do campo á escuadra da portería do Cruces. Cando parecía que estaba máis preto o gol local que o visitante, un rebote nunha falta mal executada, desviaba a traxectoria dun balón ao que Flori non puido chegar no minuto 80. A partir dese momento o Cida de Ribeira, máis con corazón que con cabeza, comezou a asediar a portería visitante. Manuel Ángel adentrouse na área e o defensa do Cruces meteu o pé chegando tarde, unha xogada polémica que o árbitro considerou penalti. Abi sería o encargado de lanzalo, pero seu disparo foi rexeitado e Anthony, o máis listo da clase, aproveitou o rexeite para poñer o definitivo 2-2. Abi tivo nas súas botas o 3-2 na última do partido, pero o balón foise demasiado alto.
