O Bloque Nacionalista Galego de Ribeira emitiu un comunicado no que solicita ao Concello a posta a punto e rehabilitación do lavadoiro de Gude, na parroquia de Artes, que malia a súa importancia, “dista moito de estar nunhas boas condicións de mantemento”, sinalan os nacionalistas. O lavadoiro está situado no lugar de Gude, na Curva do Río. A súa contorna presenta unha vexetación que medra sen control inzando de plantas os accesos e imposibilitando o seu uso ou visita. Amais, denuncian, pode atoparse na construción toda clase de lixo como latas, plásticos, envoltorios, etc. polo que “habería que realizar limpezas de maneira periódica que eviten a proliferación de residuos neste espazo público”.
En canto á cuberta, o BNG fai saber que “parte da estrutura xa comeza a cubrirse cunha hedra e as columnas teñen pintadas”. A agrupación lembra que “retirar a hedra e pintar toda a estrutura melloraría a imaxe e o estado deste ben patrimonial”.
O concelleiro, Luís Pérez Barral, rexistrou unha iniciativa no Concello tras falar con veciños e veciñas da zona que piden adecuar o lavadoiro e a súa contorna. Pérez Barral considera que “o mantemento dos espazos públicos, dos equipamentos públicos como parques e paseos así como dos bens patrimoniais brilla pola súa ausencia en Ribeira”. Desde o BNG apuntan “que o desleixo do Goberno local por manter en boas condicións este e outros elemento patrimoniais son evidentes e chega con botar unha ollada para ver o seu mal estado de conservación”. Os nacionalistas consideran que “a situación de descoido nos que están moitos lugares e espazos públicos do concello resolveríanse cunha adecuada planificación”. E engaden: “O Goberno local debería desenvolver un calendario de actuacións que inclúa rozas, limpezas e tarefas de mantemento e reparación que permitan garantir que espazos públicos como este están nun perfecto estado de condicións”.
Por todo iso, o BNG vai solicitar ao Concello que roce a vexetación, limpe a contorna de lixo, se pinte toda a estrutura da cuberta e se instalen paneis informativos con datos relevantes e coa historia do lavadoiro.
