O alumnado que participa no Obradoiro de Emprego en xestión forestal Torre Goiáns – Boiro, visitou este 28 de outubro a finca do Pazo de Goiáns para coñecer de primeira man as liñas de actuación que segue o Concello de Boiro co obxectivo de poñer en valor a contorna medio ambiental da histórica construción. Precisamente esta contorna natural é un dos lugares onde o alumnado vai actuar dentro da formación do obradoiro dual de emprego.
A formación comezou o 15 de outubro e vaise desenvolver ata o mes de xullo de 2022. Durante os nove meses o alumnado vaise formar nas especialidades de Actividades Auxiliares en Conservación e Mellora de Montes (nivel 1) e Repoboacións Forestais e Tratamentos Silvícolas (nivel 2), nas que participan un total de 20 alumnos/as repartidos nas dúas modalidades.
O alumnado traballador formaliza un contrato para a formación e aprendizaxe a tempo completo, de 40 horas semanais, durante 9 meses en horario de 7.30 a 15.30 horas. Ademais das horas de formación teórica, as e os participantes van desenvolver os traballos no acondicionamento da finca de Goiáns e outros emprazamentos naturais do termo municipal.
O Obradoiro de Emprego en xestión forestal Torre Goiáns – Boiro conta co financiamento da Consellería de Emprego e Igualdade da Xunta de Galicia, ao abeiro das axudas e subvencións para os obradoiros duais de emprego da Comunidade Autónoma de Galicia.
