Este Unión vai en serio. O calendario deparoulle aos de Asados o comezo de liga máis duro posible, e saldouno con nota. Na primeira xornada cunha vitoria na casa fronte ao Lalín e esta fin de semana traendo un punto logo da súa visita ao Flavia. Incluso pode parecer pouco para un Unión que na segunda metade mereceu moito máis e estivo máis preto do triunfo que da derrota.
Os de Luisito saltaron ao verde de Padrón repregados, pechando espazos á xente de ataque dos locais e buscando trenzar rápidos contragolpes. Ambos cadros sabían que serán rivais directos, e deixárono claro desde o principio, sen apenas arriscar e priorizando o non cometer erros nos primeiros 45 minutos.
Ben distinto foi o segundo período. O Unión saíu máis valente, mostrando unha gran condición físico para estas alturas de tempada, e comezaron a apertar ao Flavia. Luisito moveu o banquillo en busca da vitoria, que a piques estivo de chegar. Un remate á saída do córner do sempre perigoso a balón parado Pablo Novo que saíu preto do pau, foi a máis clara dunha segunda parte na que os de Asados deixaron claro que están destinados a loitar polos postos de promoción. Nada fixo mover o marcador nun encontro no que se viron dous equipos moi ben traballados.
Con este resultado o Unión sitúase na sexta posición con 4 puntos. A vindeira xornada recibirán ao Agolada.
