A cruz de Lampedusa recalou na igrexa parroquial de Santa Uxía, na que permanecerá ata a tarde deste martes. Realizada na illa italiana do mesmo nome con madeira dun caiuco que naufragou no Mediterráneo, foi bendicida polo papa Francisco. A peza é obra do carpinteiro Francesco Tuccio, que desta forma quixo honrar e lembrar o drama das 366 persoas que ían a bordo e morreron no naufraxio. O párroco de Ribeira, Alfonso Mera, sinalou que a cruz busca sensibilizar sobre a traxedia que viven os inmigrantes.
De 2,80 metros de alto, 1,50 de ancho e cun peso de 60 quilos, foi colocada no altar. Aos pés da cruz colocáronse uns chalecos salvavidas.
A cruz de Lampedusa iniciou unha peregrinación polas dioceses europeas. Antes de recalar en Santa Uxía estivo na cidade de Santiago e continuará o seu percorridompor outras parroquias galegas.
