Boiro vai dar acollida a unha nova edición da Escola do RC Deportivo, unha actividade que organiza a Escola Municipal de Fútbol xunto coa Fundación Deportivo e a colaboración do Concello de Boiro. Na presentación, que se realizou na mañá deste 22 de setembro, participaron o concelleiro de Deportes, Marcos Fajardo; o coordinador de fútbol base do RC Deportivo da Coruña, Pablo Barros; e os directivos da Escola de Fútbol Municipal, Juanvi Cameán e Mauri García.
A actividade, explicaron, vaise desenvolver durante toda a tempada 2021-2022 e está dirixida a nenas e nenos de entre 6 e 14 anos que “desexen complementar os adestramentos e a súa formación futbolística de maneira individual, personalizada e atendendo ás necesidades de cada un”.
“Para o noso Concello é sempre un pracer colaborar co RC Deportivo e a EFM con actividades como esta. Potenciar o deporte base é fundamental, das escolas municipais saen sempre moi bos deportistas”, afirmou o concelleiro de Deportes, Marcos Fajardo.
Segundo fixeron saber, a actividade vai ter unha duración anual, seguindo o calendario escolar, sendo posíbel escoller a opción de 1 ou 2 horas semanais e a participación mínima debe ser mensual.
En Boiro a actividade vaise desenvolver no Campo de Fútbol de Vista Alegre en dous horarios: os luns de 17.00 a 18.00 horas e tamén de 18.00 a 19.00 horas. “É unha actividade para divertirse e aprender, polo que animamos a todos os nenos e nenas do concello e a comarca a que participen”, afirmou Juanvi Cameán.
“Agardamos que esta edición teña tan boa acollida como as pasadas edicións e tamén o campus de verán”, afirmou Pablo Barros. As prazas son limitadas para garantir os protocolos e medidas da Covid-19 e as inscricións están xa abertas e poden facerse a través da páxina web da escola.
