Este 24 de setembro a rúa Peonil de Boiro acolle a actuación de Caldo, grupo gañador do certame Narf da Deputación da Coruña, en lembranza do artista de Silleda falecido e 2016.
Novamente a capacidade será limitada e a reserva de entradas poderá facerse na web municipal dende dous días antes do espectáculo. A cita será ás 21.00 horas.
Caldo son María Jorge (violín), Anaïs Barbier (voz e pandeireta) e Pedro Fariñas (guitarra e gaita). A banda, centrada na melodía tradicional galega dende unha óptica contemporánea e un filtro de novos contextos sonoros, foi o grupo gañador da final do Concurso Fran Pérez “Narf” para grupos e artistas musicais que promove a Deputación da Coruña e que tivo lugar en novembro no Teatro Colón da Coruña.
Francisco Xavier Pérez Vázquez, “Narf”, nado en Silleda o 24 de abril de 1968 e finado en Santiago de Compostela o 15 de novembro de 2016, foi un dos grandes músicos galegos das pasadas décadas, cantante, compositor e integrante da banda Os Quinindiolas e mais de Nicho Varullo, da compañía teatral Chévere e posteriormente da Psicofónica de Conxo. Sobresaíu pola súa capacidade para ensanchar os horizontes da música galega, e tamén como compositor de bandas sonoras para teatro e outros espectáculos, compaxinando esta faceta coa de actor en diferentes funcións teatrais.
