20190909. A Fundación Axencia Enerxética Provincial da Coruña (FAEPAC), dependente da Deputación da Coruña, asesorará durante un ano ao Concello de Rianxo en materia de aforro e eficiencia enerxética. Así o establece o convenio asinado hoxe na sede da institución provincial entre o presidente, Valentín González Formoso, e o alcalde da localidade, Adolfo Muíños Sánchez. Ao acto asistiu tamén a tenente alcalde María del Carmen Figueira.
Os técnicos da FAEPAC realizarán unha análise enerxética das instalacións e dependencias municipais co obxectivo de establecer un plan personalizado de mellora da eficiencia enerxética, uso racional da enerxía e fomento de fontes renovables.
A axencia provincial tamén se compromete a prestar asesoramento técnico en tódalas actuacións que desenvolva o Concello de Rianxo para mellorar a súa eficiencia enerxética. Neste sentido, realizarase un seguimento e control das facturas por consumo de electricidade, auga quente e calefacción dos servizos públicos e manterase informado ao cabido sobre as modificacións lexislativas e tarifarias, as convocatorias de axudas públicas, así como os novos materiais, produtos, sistemas e servizos susceptibles de ser implantados nas instalacións municipais.
Así mesmo, a FAEPAC encargarase da formación do persoal do Concello, para que adquiran as competencias necesarias para asegurar a redución das emisións e a mellora da calidade ambiental no municipio.
González Formoso manifestou que, a través da prestación destes servizos, un dos obxectivos do actual goberno provincial é “utilizar o coñecemento da FAEPAC para axudar aos concellos a aforrar na súa factura eléctrica”, un gasto que para algúns municipios do ámbito rural supón unha das maiores partida do seu gasto corrente, xunto coa de persoal.
