A Policía Local de Ribeira informou este 11 de agosto de varias actuacións levadas a cabo nas parroquias en materia de seguridade cidadá e anti-COVID. En concreto, as actuacións desenvolvéronse en Corrubedo e Palmeira, onde se procedeu a neutralizar dúas festas ilegais de madrugada.
Así, pasada a unha e media, axentes da Policía Local detectaron un grupo de rapaces que estaban a celebrar un botellón con mesas en cadeiras en Corrubedo na entrada da vila, nas proximidades da rúa Buenos Aires. No operativo (no que tamén participou o Corpo Nacional de Policía) deuse orde de recoller todo o material disposto polos participantes e identificouse a algúns dos asistentes en cumprimento das medidas preventivas determinadas polas autoridades sanitarias.
Ademais, a Policía Local foi avisada doutra festa na praia da Corna, en Palmeira. No momento de chegar, catro rapaces escaparon á carreira deixando no lugar do evento ilegal diversas bebidas alcohólicas que os axentes procederon a depositar no correspondente contedor.
Intento de roubo
Así mesmo, entre as cinco e as seis da mañá acudiron á parroquia de Castiñeiras por un intento de roubo nun bar no que, grazas a unha chamada do 112 e tamén de veciños que sentiron romper un cristal, sorprenderon a dúas persoas. O operativo fíxose en colaboración coa Policía Nacional, abríndose as correspondentes dilixencias.
