Este venres 6 de agosto inaugurouse a mostra As cores de Corrubedo na Casa do Mar da dita vila mariñeira. Trátase dunha exposición colectiva que reflicte, de tres maneiras diversas, como afectou o confinamento (e a morriña xerada polo encerro) noutras tantas artistas vencelladas a Corrubedo. Son preto de corenta creacións de Ana Ingelmo, filla de corrubedáns nacida en Santander; Isa Penabal, santiaguesa afincada na Bretaña Francesa; e María José Salgueiro, corrubedá de nacemento e residente en Sevilla.
O acto inaugural desenvolveuse no mediodía deste venres, con participación da concelleira de Cultura María Sampedro e do presidente da comisión de festas Abdón Santos, responsábel da organización desta proposta cultural na que se exhiben diversas paraxes na actualidade como a praia do Prado (moi ligada ás dúas primeiras artistas devanditas), O Cantón, A Robeira ou A Robeiriña. Tamén se recrean fotografías antigas baixo a ollada de María José Salgueiro.
A mostra poder ser visitada ata o 22 de agosto a iniciativa da Comisión de Festas e a colaboración do Clube de Pensionistas e Xubilados de Corrubedo e o Concello de Ribeira.
