O Concello de Boiro celebrou na mañá deste 19 de xullo unha nova sesión da Comisión de Seguimento e Evolución da COVID-19, co fin de coñecer a incidencia da pandemia no municipio e determinar medidas e restricións para frear o número de contaxios. Na sesión compartíronse os datos recentes e actualizados da Consellería de Sanidade, que confirman que o número de novos positivos segue en aumento.
En concreto, o municipio atópase en nivel medio de restricións dende o pasado sábado. Polo tanto, a hostalaría poderá permitir o 50% de aforo nas terrazas e o 30% en interior. O número máximo de persoas será de 6 no ámbito privado ou interiores e 10 no exterior.
Ademais, non se permite o uso e estancia de praias, prazas e parques públicos entre as 00:00 e as 6:00 horas. De feito, a Policía Local intensifica a vixilancia, sobre todo durante a fin de semana, para evitar que se produzan aglomeracións nestes lugares.
Doutra banda, cómpre mencionar que nos últimos días interpuxéronse un total de 14 denuncias por incumprir as restricións: 3 delas por incumprir a capacidade máxima das terrazas; 1 por non cumprir as medidas para o acceso do ocio nocturno; 5 por concentracións de persoas en espazos públicos fora do horario establecido; 4 por beber na vía pública e 1 polo uso indebido de máscara.
Con todo, o departamento de Servizos Sociais continúa coa coordinación das necesidades derivadas das persoas con positivo por parte de Protección Civil, Cáritas ou Cruz Vermella.
