20190905 Rianxo on Fire é a aposta alternativa, contundente, tralleira e rompedora das Festas da Guadalupe: a vertente das celebracións rianxeiras máis directamente encamiñada a facerlles sombra aos festivais independentes máis concorridos da nosa xeografía. Actuarán este ano as seguintes bandas: Hernia Eskrotal, Copa Turbo, Glitchgirl, Ñuca e The Conspiracy. Todo un luxo punk para as que se cadra son as festas máis integradoras e diversas de cantas se celebran e Galicia nesta recta final do verán.
Rianxo on Fire desenvolverase o 20 de setembro á noitiña, na praza da Igrexa. Organizan a Asociación A Moreniña e máis o Concello de Rianxo. Para quen non o saiba, o festival Rianxo on Fire ten no Facebook unha sección de seu, onde se van dando conta das novidades do cartaz, dos grupos que actúan en cada edición, dos vídeos de actuacións de anteriores entregas do certame e de todas aquelas cousas que lle pode interesar á comunidade de seareiras e seareiros do rock independente.
