Falece unha muller nun accidente na Ag 11 a altura de Boiro. Ampliación

Foi precisa a intervención dos Bombeiros de Boiro para liberar á vítima do interior do vehículo e que, pese aos intentos, nada se puido facer por salvarlle a vida.

Varios particulares contactaban co 112 Galicia, sobre as doce deste mediodía, para informar do accidente. Aseguraban que un coche colidira contra outro que estaba parado e que podía haber persoas feridas e atrapadas.  

Precisamente, debido á gravidade do sinistro e, tras confirmar que unha persoa quedara atrapada no interior dun dos vehículos, os servizos sanitarios derivaron ao punto un helicóptero medicalizado, que tomou terra na mesma Autovía.  Por iso, para facilitar  a aterraxe da aeronave, foi preciso interromper a circulación nun carril da Autovía.

O accidente ocorreu na AG-11, ao redor do punto quilométrico 23, en Cespón, sentido Ribeira.

Nada máis recibir as chamadas dos alertantes, desde o 112 Galicia pasouse aviso de inmediato ao Servicio de Urxencias Sanitarias de Galicia-061. Do mesmo xeito, foron informados os Bombeiros de Boiro e Ribeira, que tamén acudiron nada mais ser alertados, ao igual que os axentes de Tráfico, da Policía Local, e os efectivos de Protección Civil da localidade.

Finalmente, os servizos sanitarios tras confirmar o falecemento da muller, indicaron que outra persoa tamén fora atendida no mesmo lugar dos feitos, aínda que non chegou a ser trasladada.

A intervención do persoal do servizo de mantemento da vía tamén foi requirida polo 112 Galicia.,