O BNG, a través da súa deputada Rosana Pérez (A Pobra do Caramiñal 1964), puxo de manifesto este venres 25 a súa postura respecto dos proxectos eólicos mariños que prepara a compañía eléctrica Iberdrola no noso litoral, na Mariña e en Ortegal, que para o grupo nacionalista “prexudicarían gravemente a pesca e o marisqueo”. O BNG pediu que se prohiba que as grandes eléctricas se beneficien de fondos europeos en detrimento do sector pesqueiro galego.
A deputada da Pobra reclamou a “retirada” dos proxectos e anunciou diversas iniciativas, no Congreso e Parlamento galego así como encontros cos sectores máis afectados para recoller as diferentes demandas contra o modelo eólico mariño do PP destinado a beneficiar “ás grandes empresas eléctricas sen que a produción enerxética reverta en Galiza”.
En comparecencia pública ante os medios de comunicación, a nacionalista explicou que “o 26 de maio tivo lugar un pacto no Parlamento galego entre PP e PSOE para abrir a porta a implantación da eólica mariña na costa galega”. Con este acordo, denunciou a deputada, “PP e PSOE rachaban o consenso político acadado na Cámara galega en maio do ano 2009”. Hoxe, de feito, recalcou, “o Goberno do Estado dálle a razón ao BNG ao suspender a presentación de todos os proxectos de parques eólicos mariños até a elaboración dun novo marco normativo”.
