20190830. Un total de 86 establecementos en toda Galicia, 24 deles na provincia da Coruña, participan nunha nova edición do programa ‘Outono Gastronómico en Turismo Rural’, que pon en marcha a Consellería de Cultura e Turismo. O delegado territorial da Xunta na Coruña, Ovidio Rodeiro, achegouse ata a Dársena da capital provincial na que se instalou o autobús itinerante que promociona a edición 2019 deste programa, que se desenvolverá entre o 13 de setembro e o 15 de decembro.
Ademais de aloxamento, os establecementos que participarán nesta actividade ofrecerán diferentes menús especiais para este programa, elaborados con produtos galegos de tempada. Así mesmo, como novidade este ano, inclúese a posibilidade de realizar, no seu caso, actividades complementarias á estancia coma paseos a cabalo, rutas de sendeirismo, visitas ao Pórtico da Gloria, ou iniciación ao surf, grazas á nova oferta Outono Plus.
Entre as diferentes modalidades que ofertarán para gozar desta actividade en parella, en familia ou con amigos figura o Menú Outono Gastronómico –sen pasar a noite–, o Paquete Outono Gastronómico para unha noite, o Fin de Semana Outono Gastronómico para dúas noites ou Fin de semana familiar Outono Gastronómico para dúas noites con nenos, con prezos que varían entre os 30 e os 300 euros.
O delegado territorial destacou que “esta iniciativa promove a desestacionalización da demanda, que é un dos principais obxectivos da Estratexia do turismo de Galicia 2020, o documento da Xunta de Galicia no que se recollen os compromisos, oportunidades e retos para o sector.”
Ovidio Rodeiro recordou que, desde a súa posta en marcha, no Outono Gastronómico participaron máis de 64.000 persoas e os establecementos adheridos facturaron preto de 4 millóns de euros. Tamén os negocios participantes cualificaron cun 4’7 sobre 5 a súa experiencia neste evento e nove de cada dez amosáronse partidarios de repetir a experiencia.
