Este martes día 8 de xuño está convocada por CNT a oitava xornada de folga no Consorcio Galego de Servizos de Igualdade e Benestar para buscar unha solución a todas as traballadoras temporais en fraude de lei e abuso de temporalidade, con independencia da forma de acceso ao seu posto (oposición, listas, subrogación,…). No caso do Barbanza, a mobilización centralizarase en Boiro, ás 19.30 horas na praza de Galicia, diante do Consistorio.
Con estas protestas trátase de estender e achegar a protesta a todo o persoal das escolas infantís da Galiña Azul, centros de día, fogares residenciais e de todos os centros de traballo da rede do Consorcio Galego de Servizos de Igualdade e Benestar, “especialmente ás traballadoras que se ven privadas do dereito á folga debido aos servizos mínimos abusivos decretados”, explican dende a CNT, engadindo que un dos obxectivos “é procurar a compañía nas mobilizacións das familias usuarias dos servizos do consorcio que sofren a ineptitude da Xunta para solucionar esta situación de conflito”.
Engaden que “se precisa tamén da solidariedade de todo o persoal público temporal de todas as administracións en situación de fraude e abuso de temporalidade que, ao igual que as traballadoras do Consorcio IeB, sendo vítimas da mala xestión das administracións ven agora perigar o seu posto de traballo que levan anos ocupando debido a inxustos procesos de regularización da temporalidade”.
