A área de Cultura da Deputación da Coruña vén de confirmar que 32 concellos da provincia contratarán persoal de museos con financiamento da entidade provincial. Serán, en total (posto que seis dos concellos presentaron dúas solicitudes), 38 contratos, destinados a “contribuír á profesionalización dos centros culturais municipais”. A liña conta cun orzamento de 382.929 euros. No caso da nosa comarca, atópanse os Centro de Interpretación do Muíño das Mareas de Muros, do Castro de Baroña en Porto do Son, das Minas de San Finx en Lousame ou a Casa Museo Manuel Antonio en Rianxo, o Museo da Memoria Mariñeira no Son ou o Museo Municipal de Ribeira, entre outros da nosa contorna (que se poden consultar no BOP deste 1 de xuño).
Os concellos que presentaron dúas solicitudes para dotar de persoal a dous centros culturais dos seus termos municipais foron Camariñas, Muros, Oleiros, Porto do Son, Rianxo e Ribeira.
“Con esta convocatoria queremos colaborar cos concellos na xestión máis profesional de centros culturais como museos ou centros de interpretacións que son, en moitas ocasións, verdadeiros focos de atención cultural e recursos turísticos de especial relevancia”, explicou o deputado de Cultura da Deputación da Coruña, Xurxo Couto, engadindo que “esta liña de axuda súmase á de persoal técnico de xestión e animación sociocultural que contribúen á creación do emprego no sector e á mellora na personalización da cultura, un dos obxectivos da área de Cultura da Deputación da Coruña”.
Os concellos recibirán, segundo a resolución que sae hoxe 1 de xuño publicada no BOP, axudas que van desde os 15.000€ aos 4.907€.
