Por iniciativa dun grupo de amigos, quen fora presidente fundador da Agrupación de Voluntarios de Protección Civil de Ribeira, Manuel Dieste Mos, vai dar nome a unha nova carreira cun carácter solidario ligado coa enfermidade que o levou no ano 2017: o I Memorial Manolo Dieste, a beneficio de Asotrame, a Asociación Galega de Transplantados de
Médula Ósea.
María José Carreira explicou que a idea de celebrar esta iniciativa xurdiu a raíz do impulso polo hospital clínico dunha campaña de micromecenazgo para apoiar a investigación do trasplante de médula ósea, e veron nesta proba deportiva unha maneira de contribuír ao tempo que recordar a Manolo Dieste, falecido por unha leucemia.
A cita ten lugar este domingo día 30 de maio a partir das 10 horas e reunirá unhas características moi condicionadas polo covid. Así, segundo explicou Abraham Benítez, as saídas dos participantes terán lugar dende a punta do peirao de Ribeira cada dez segundos (aínda non se decidiu se tales saídas serán individuais ou por parellas). O trazado terá unha distancia de 5 kilómetros cun perfil moi chan, cunha soa volta entre o Touro e o Náutico.
Haberá un máximo de 150 prazas e as persoas interesadas poderán apuntarse a través de galitiming.com. O custe é de 6 euros.
Dorsal cero
Haberá ademais un dorsal cero para todos aqueles que non puidendo participar si queiran contribuír a esta causa. O número de conta no que aportar as doazóns é ES75 2080 0240 38 3040004920.
O alcalde Manuel Ruiz agradeceu a iniciativa e brindou a colaboración do Concello en todo o que se solicite. “Se Manolo levantara a cabeza estaría moi orgulloso dos seus amigos e da labor benéfica que a través do seu nome e a súa figura vai poder seguir adiante”, declarou.
Como consecuencia da celebración da carreira varias rúas do centro de Ribeira veranse afectadas con cortes puntuais de tráfico a partir das 10 horas. Zona portuaria, As Carolinas, Avda. García Bayón e Praza do Concello.
