O director xeral de Comercio, Manuel Heredia, estivo este xoves 27 de maio en Boiro para consolidar marcos de colaboración co Concello e a Asociación Boirense de Empresarios con vistas a revitalizar, impulsar e fortalecer a actividade económica local. Heredia visitou Boiro na compaña do alcalde José Ramón Romero, o concelleiro de Comercio e Industria, Marcos Fajardo, o presidente da Asociación Boirense de Empresarios, Daniel García, e o xerente da patronal, Tomás Estévez.
Na xuntanza celebrada no Consistorio o rexedor e o edil expuxéronlle as liñas de traballo do Goberno local en materia de comercio para potenciar a reactivación económica do sector. Segundo lle trasladaron, os tres piares básicos e nos que o Concello traballa son o comercio local, o Mercado Municipal e o mercado semanal que se celebra os martes.
Durante a visita a Boiro, Manuel Heredia realizou unha visita ás instalacións do Mercado Municipal para coñecer as obras de mellora e tarefas de acondicionamento que o Concello está a realizar con vistas a conseguir o selo de mercado de excelencia. O obxectivo do Concello é “facer unha mellora nos servizos para integrar o mercado na vida social e comercial do municipio”, informaron o alcalde e máis o concelleiro
José Ramón Romero agradeceu ao director xeral a súa visita a Boiro e a súa posta a disposición para “o traballo en conxunto entre as administracións para que o Mercado Municipal acade o selo de excelente e mellore a atención e servizos aos clientes e consumidores”.
