A Rede Cultural da Deputación ofrece este ano 1.409 espectáculos en todos os concellos da Coruña. O deputado Xurxo Couto deu a coñecer os detalles do programa, destacando a que a Rede foi quen de “manter o nivel de contratación mesmo nos momentos máis difíciles da cultura ao vivo”. Tamén salientou o seu potencial para converterse, agora, “nunha ferramenta de recuperación”. O circuíto artístico move un total de 2.617.391 € euros dos que 1.551.240 € se corresponden á achega da área de Cultura da Deputación da Coruña.
Teatro, música, danza, maxia ou cine son algunhas das propostas da Rede Cultural da Deputación da Coruña que programará nos concellos da provincia un total de 1.409 espectáculos. Serán, por modalidades, 198 películas do programa Visións; 173 actuacións da modalidade Lingua a escena destinada á promoción do galego a través da cultura; 112 propostas de cultura non profesional e, o groso do programa, un total de 926 actuacións de artistas e compañías profesionais das que 524 son obras teatrais, 299 concertos musicais, 65 espectáculos de maxia e 38 de danza.
