A Asociación de Empresarios de Boiro (ABE) iniciou unha campaña para promover os Bonos Activa de Comercio da Xunta de Galicia. Ditos bonos poderán ser adquiridos por todos os comercios da localidade, sexan ou non asociados da patronal boirense.
O proxecto ten como obxectivo incentivar o consumo en toda Galicia, mobilizando máis de 55 millóns de euros en vendas nos comercios de proximidade. A iniciativa dos bonos desenvolverase a través dunha aplicación móbil. Desta forma, cada comercio poderá ofrecer aos seus clientes ata 5.000 euros en descontos. O consumidor irá gastando o importe do bono en función do valor da compra. As compras iguais ou superiores a 30 euros, terán un desconto de 5 euros; mentres que as iguais ou superiores a 50 euros, contarán cun desconto de 10 euros. O período de validez dos bonos será de tres meses.
Os comercios que queiran adherirse deberán poñerse en contacto coa ABE, xa que precisarán do distintivo da campaña para poder ser identificados polos clientes. Ademais, a Xunta de Galicia xestionará toda a documentación a través das asociacións.
