O Concello de Ribeira informa de que este 15 de abril ábrese o prazo para presentar solicitudes para participar en dúas accións formativas enmarcadas no PEL-Emprego Sustentábel da Deputación da Coruña. Máis en concreto, un curso de comunicación en lingua castelá e matemática de 240 horas e outro co mesmo nome pero de 400 horas de duración.
Estas accións están dirixidas ao acceso dos niveis 2 e 3 de certificados do Sistema de Formación Profesional para o Emprego, ao desenvolver no proxecto PEL Emprego Sustentable no Ámbito Rural, co-financiado con axudas AP-POEFE do Fondo Social Europeo.
Poden presentar solicitudes as persoas desempregadas, non ocupadas e non integradas nos sistemas de educación ou formación, inscritas na Oficina de Emprego.
A presentación de solicitudes desenvolverase de forma telemática a través do Portelo Dixital do Concello de Ribeira, na opción Trámites en liña – Solicitude de Carácter Xeral. Se a persoa interesada non utiliza a vía telemática, poderá descargar o impreso ou impresos dende a propia páxina ou acudir á Oficina de Atención Cidadá do Concello, onde lle será facilitado o dito impreso/s normalizado/s para presentar.
Os cursos son de carácter presencial. O de 240 horas impártese nas seguintes sedes: Acerta Formación SLNE (Cee), El Ábaco (Baio, Zas), Ensino SL (As Pontes), Escola de Finanzas (Oleiros), Forma-Tec Multisectorial SLNE (Padrón), Grupo Athenea (Ordes), Edificio Multiusos Praza das Universidades (Melide), Casa da Cultura (Negreira).
O de 400 desenvolverase nas seguintes localizacións: Forma-TEC Multisectorial SLNE (Padrón) e Escola de Finanzas (Oleiros).
