O alcalde de Boiro, José Ramón Romero, e o concelleiro de Patrimonio, Raúl Treus, visitaron esta mañá o Pazo de Goiáns acompañado do arqueólogo municipal, Víctor Barbeito, para coñecer o estado da execución das obras de
restauración do inmoble e os traballos de limpeza e acondicionamento que se están a realizar na finca.
As obras de rehabilitación avanzan a bo ritmo. Está xa colocado o pavimento cerámico da planta Baixa, para o que se empregou unha baldosa hidráulica de pasta branca e decoración azul, un material que data de mediados do século XIX e que se colocou do modo orixinal, formando alfombras en cada estancia do Pazo.
Nas ultimas semanas estase procedendo tamén á colocación das ventás e portas interiores do inmoble, realizadas en pino albar e colocadas coa técnica de batente directo sobre pedra, tal e como se realizaba a colocación na
arquitectura compostelá dos séculos pasados.
O Concello de Boiro está traballando no acondicionamento dos xardíns e toda a contorna da finca, detectando árbores que poden ser catalogadas como senlleiras. Tamén se está traballando no mantemento das edificacións anexas
para evitar que se sigan degradando.
No mes de abril convocarase unha segunda Comisión de Avaliación e Planificación do futuro do Pazo de Goiáns, formada por un comité técnico municipal de distintos ámbitos para facer unha análise dos distintos aspectos
do inmoble e a súa contorna para determinar as potencialidades do espazo e determinar os posibles usos do mesmo.
