Baixo o nome de Co-Mutare, os municipios da Pobra do Caramiñal e Rianxo desenvolverán un obradoiro de emprego compartido, un proxecto que arrincará co fin de facilitar a inserción laboral da veciñanza combinando o traballo e a formación.
O obradoiro integrará a formación e empregabilidade, un mecanismo que facilita a cualificación laboral dos traballadores a través da obtención do correspondente certificado de profesionalidade do nivel 1. O proxecto permitirá ás persoas que máis difícil teñen o acceso ao mercado laboral, xa sexa por baixo nivel formativo ou outras circunstancias.
Co-Mutare implicará durante nove meses a inserción laboral das 20 persoas participantes. As especialidades que se van impartir son “Actividades Auxiliares en conservación e mellora de montes” e “Actividades auxiliares en aproveitamentos forestais”. Así, o concello da Pobra levará a cabo a labor administrativa e as aulas teóricas transcorrerán en Rianxo, mentres que a práctica realizarase en ámbolos municipios.
A edil rianxeira da Promoción Económica, María del Carmen Figueira, enumerou os obxectivos principais das intervencións, que serán o coidado dos espazos naturais a través da repoboación, da roza e da eliminación de axentes causantes de pragas e especie invasoras. No caso da Pobra contarase coa colaboración das comunidades de montes de Lesón e Posmarcos, para levar a cabo as actuacións no miradoiro de Valle-Inclán e na súa contorna. Doutra banda, en Rianxo as accións focalizaranse en terreos municipais, sobre todo na zona do Barral.
O alcalde de Rianxo, Adolfo Muíños, salientou o positivo de que dous concellos se unan para face-la solicitude deste tipo de obradoiro, co fin de lograr un alto índice de inserción xa que hai empresas interesadas en perfís laborais similares aos impartidos no proxecto.
Pola súa parte, o rexedor da Pobra, Xosé Lois Piñeiro, manifestou que “é necesario que haxa iniciativas deste estilo que poñan en valor tódolos recursos que temos no monte”.
