A brass band Brassica Rapa realizará unha ruada musical por Rianxo este domingo, 7 de marzo. A proposta enmárcase no programa da Rede Cultural da Deputación da Coruña.
A banda, composta integramente por mulleres, ofrecerá un espectáculo moi variado que mesturará música instrumental e vogal coa multipercusión. O seu repertorio vai dende grandes éxitos do pop á música tradicional galega, pasando por temas máis jazz, música actual reivindicativa ou bandas sonoras de películas.
Estas artistas recollen influencias das brass bands neoiorquinas, pero tamén das big bands ou das charangas tradicionais. Incluso as compoñentes veñen de distintos percorridos dentro do mundo da música, e de agrupacións coma Liska, Banda Xangai, Timparrantela ou Biribirlocke.
