A Concellería de Cultura da Pobra do Caramiñal pon en marcha unha nova edición do Outono Cultural, que levará ao Teatro Cine Elma cinco representacións durante os meses de novembro e decembro. Todas as funcións comezarán ás 19.00 horas e serán de balde ata completar a capacidade do recinto.
A programación reúne “diferentes compañías do panorama teatral galego” e combina “humor, crítica social e reflexión arredor de cuestións de actualidade”, informou o Concello, engadindo que “o obxectivo desta iniciativa é achegar as artes escénicas ao público e fomentar a asistencia ao teatro a través dunha oferta cultural variada”.
O ciclo abrirase o domingo 8 de novembro con Señores, da compañía De Ste Xeito. Trátase dunha comedia feminista que aborda as relacións familiares e os roles de xénero desde o humor. A proposta presenta mulleres que interpretan homes que pretenden ditar como deben comportarse as mulleres, nun espectáculo que cuestiona os estereotipos e as actitudes machistas.
O domingo 15 de novembro chegará Os dous de sempre, de Mofa&Befa, o dúo cómico formado por Evaristo Calvo e Víctor Mosqueira. Nesta ocasión, levarán ao escenario os personaxes de Pedriño e Rañolas, creados por Castelao, recuperando o universo humorístico do escritor rianxeiro. A representación está incluída no programa Outono das Artes da Deputación da Coruña.
A seguinte cita será o domingo 22 de novembro con Cotorras, de Malasombra Teatro. A obra, protagonizada por Luis Iglesia e Victoria Teijeiro, presenta unha comedia sobre a hipocrisía dun político que defende publicamente a igualdade, o apoderamento e a xustiza social, mentres mantén comportamentos machistas na súa vida privada. Unha proposta que emprega a sátira para poñer de manifesto as contradicións entre o discurso público e as actitudes persoais.
Xa en decembro, o domingo 6, Amorodio Teatro representará Cortello de amor, con Carmen Facorro e Javier Castiñeira. Esta comedia, marcada pola retranca galega, aborda problemáticas actuais como o elevado prezo dos alugueiros e o turismo non sostible, utilizando o humor para reflexionar sobre as dificultades de acceso á vivenda.
O Outono Cultural pecharase o domingo 13 de decembro con Nas nubes, de Redrum Teatro. Escrita por José Luis Baños de Cos e dirixida por Álex Sampayo, a obra presenta os personaxes de Nexus e Rino, que guían o público por un museo onde se exhiben estrañas reliquias da era predixital. A representación convida a reflexionar sobre o impacto da tecnoloxía, a fraxilidade da identidade e os límites entre a realidade e os soños.
Unha programación coa colaboración da Deputación da Coruña
Esta nova edición do Outono Cultural conta coa colaboración da Rede Cultural da Deputación da Coruña e do programa Outono das Artes, promovido pola institución provincial.
Con esta proposta a Concellería de Cultura continúa a súa aposta por ofrecer “unha programación escénica accesíbel” e “por consolidar o Teatro Cine Elma como espazo de encontro arredor da cultura”.
