Este venres 30, San Marcelo, será unha xornada marcada pola estabilidade meteorolóxica e o tempo seco, baixo a influencia continuada das altas presións situadas en Europa Central.
Na capital galega, a mañá espertará con probabilidade dalgún banco de néboa ou brumas nos vales e zonas baixas, pero tenderá a despexar a medida que avancen as horas. Durante a maior parte do día predominarán os ceos con intervalos de nubes altas que non impedirán o paso do sol nin deslucirán o ambiente.
Nas Rías Baixas a previsión é moi semellante: xornada soleada e apracible, con nubes de tipo alto que cruzarán o ceo de xeito intermitente. As brétemas costeiras quedarán circunscritas preferentemente ao litoral norte de Galicia, permitindo que a franxa costeira das Rías Baixas goce de boa visibilidade e condicións moi favorables ao longo de todo o día.
No eido térmico, a metade oeste galega rexistrará un lixeiro ascenso das temperaturas máximas, deixando un ambiente morno nas horas centrais(máximas de 21 a 24 graos). O réxime de ventos comezará soprando frouxo de compoñente leste, aínda que virará a norte de cara á noite, cando aumentará a intensidade moderada e fará baixar a sensación térmica ao final da xornada.
O noso mar; Vento do leste á mañá, do norte á tarde e do nordés á noite, forza 1 a 2 á mañá, 2 a 3 á tarde e 3 a 5 á noite. Mar rizado á mañá, mar ovellado á tarde e marusía á noite. Visibilidade boa. Mar de fondo do noroeste, con ondas de 1 a 2 metros.
