20190816 Este 15 de agosto volveuse cumprir a máxima de que sempre volve arder sobre o queimado. O concello de Lousame, un dos máis afectados polo lume reiterado, xunto con Boiro ou Rianxo, foi novamente vítima das lapas, concretamente a parroquia de Tállara, unha das máis poboadas do municipio. Finalmente o incendio ficou sufocado ás 01.23 horas de hoxe, logo de ter sido controlado sobre as 21.00 horas do xoves pola noite. A nube de fume, arrastrada polo vento do norte e nordeste, foi visíbel en toda a comarca de Barbanza, mesmo chegando á costa de Ribeira e ás praias.
Segundo informou a Consellería de Medio Rural, o incendio iniciouse ás 16,36 h. de onte e afectou a 19,6 hectáreas, 10 delas de monte arborado e 9,6 de raso (medición provisional á espera de que se faga unha estimación máis exhaustiva). Traballaron na extinción 5 axentes, 11 brigadas, 5 motobombas, 2 pas, 7 helicópteros e 1 avión.
A Consellería do Medio Rural, xunto cos datos devanditos, aproveitou para lembrar que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e de balde para denunciar calquera actividade delituosa incendiaria da que se teña sospeita ou coñecemento: 900 815 085.
