O Concello de Boiro levou a cabo a renovación do alumeado público na zona do Corrillo e Boiro de Arriba. As anteriores luminarias de vapor de sodio e luz laranxa foron substituídas por luces LED e de cor branca.
Esta actuación mantén a aposta do Concello por mellorar o aforro enerxético e reducir consumos e emisións de CO2. Os núcleos de Treites, Louriño, Brea, Valmaior, Vilariño, Sandrenzo, Comba, Cespón, Nine e Cimadevila foron anteriormente renovados, cun total de 650 luminarias. A estas súmanse as do Corrillo e Boiro de Arriba, e nos vindeiros días as da zona da Ferrería.
As novas luminarias do Corrillo e Boiro de Arriba terán unha potencia 60w, reducindo o consumo eléctrico, ademais de mellorar a nitidez en camiños e estradas. Deste xeito obtense un aforro do 65%, un total de 30.000 euros anuais. Ademais contribuirá á redución da emisión do CO2 en ata 70 toneladas anuais.
