O Concello de Rianxo compartiu estes días unha serie de cambios realizados no programa do festival de teatro de máscaras e monicreques Titiriberia, que se celebra este Nadal na vila rianxeira. Segundo fai saber o Concello, decidiuse que os espectáculos programados de Titiriberia para o CCD de Taragoña sexan trasladados finalmente á Sala Arcos Moldes do Auditorio de Rianxo. Son, concretamente, O Baúl de Barriga Verde, de Títeres Cascanueces, o sábado 26 de decembro, ás 18.00 horas; e Teatro á feira de A cova das letras, o domingo 27 ás 12.00 horas.
Por outra banda, as citas que estaban previstas para os soportais da praza Castelao terán tamén un novo emprazamento: o salón de actos do Cuartel Vello, os mércores 23 e 30, de 12.00 a 14.00 horas. Son Vitoria. Nostalxias do pasado, de Diáspora Teatro e Este espectáculo foi ilegal, de Seisdedos marionetas.
“Debido a evolución da situación epidemiolóxica no concello, para o bo e seguro desenvolvemento das actividades, intensificaranse as medidas de prevención como maior distanciamento social, redución de aforo, incremento de limpeza e desinfección”, engadiu o Concello ao fío da crise sanitaria que se intensificou estes días no termo municipal.
