O Festival Titiriberia de monicreques e teatro celebrará en Rianxo entre o 22 e 30 de decembro a súa quinta edición, que vén cun programa descentralizado e diverso, con actividades seguras e controladas a celebrar en varias localizacións do termo municipal: o Auditorio Municipal, a Casa de Cultura Cuartel Vello, os soportais da praza Castelao e os centros socioculturais e deportivos de Atalaia-Asados, Araño e Taragoña. As accións programadas poderanse seguir integramente a través da Rede, co fin de garantir o control sanitario ao tempo que se garante o acceso do público ás actuacións.
O Festival Titiriberia é organizado pola Asociación Morreu o Demo coa colaboración do Concello de Rianxo e a Deputación da Coruña.
En total, unha ducia de funcións conformarán o programa deste ano no que tamén se inclúen mesas redondas, exposicións e obradoiros, como por exemplo obradoiro sobre teatro de máscaras do que falamos onte en O Barbanza.
Ao longo dos sete días presenciais que durará o festival, pasarán por Rianxo compañías como Viravolta Títeres, Diáspora Teatro, Seisdedos Marionetas, Fantoches Baj, Títeres Cascanueces, Xirapaus ou a Cova das Letras, o colectivo Indignati Asociación Galega de Commedia dell’Arte, artistas como Fran Rei, Borxa Insua, Iria Pinheiro, Lucho Penabade, Tero Rodríguez, Borxa Insúa e Esther Carrodeguas, ou grupos de música como Áureas.
O programa
A programación comezará o martes 22 de decembro, da man da
compañía Viravolta Títeres, que ofrecerá no Centro Sociocultural A capela do Araño dous pases (ás 17.00 e ás 19.00) do seu espectáculo O horroroso crime de Xan Miñoca, espectáculo de monicreques de cachaporra con música de piano en directo. Será ese o inicio dun programa que, entre os seus pratos fortes, conta con As varietés do Barriga Verde, un formato multidisciplinar que mestura os bonecos co cabaré, a música, a poesía ou o escapismo. Así, o último día do Titiriberia, o 30 de decembro ás 20.00 h., no Auditorio Municipal de Rianxo actuarán Esther Carrodeguas, Tero Rodríguez, Lucho Penabade, Pajarito, María Dobronich, Borxa Ínsua e Lázaro Duyos. As varietés de Barriga Verde estará conducido por Iria Pinheiro e contarán co acompañamento escénico-musical do grupo Áureas.
Commedia Dell’Arte e a cachaporra
Nesta edición, terá unha interesante presenza a commedia dell’Arte, xénero
teatral que protagonizará diferentes aspectos do programa. Deste xeito, o actor, director e profesor na Escola Superior de Arte Dramática (ESAD) ofrecerá a conferencia Commedia dell’Arte: artesanía teatral, o sábado 26 de decembro ás 19.30 no Centro Sociocultural A capela do Araño. O propio Llera impartirá, por outra banda, un Obradoiro de iniciación á commedia dell’arte os días 26 e 27 no mesmo recinto.
Outra das actividades que destacan da programación é a mesa redonda que
terá lugar o vindeiro 28 de decembro ás 20.00 h. no Auditorio de Rianxo que, baixo o título A innovación da Cachaporra. Novos xeitos para traballar a tradición, reunirá a Santi Prego, Inacio Vilariño e Alba Grande. Moderada por Comba Campoi, a mesa se centrará na tradición e na innovación no histórico xénero da cachaporra.
A edición rianxeira
Nesta edición de 2020, a primeira que se celebrará en Rianxo tras catro anos no municipio de Teo, o Titiriberia incluirá unha programación cuxo obxectivo principal será, un ano máis, “achegar ao público a longa tradición do títere tradicional, xénero escénico cun gran arraigamento histórico na cultura galega”. Neste ano tan insólito e complexo por mor da pandemia, o festival adaptarase ás circunstancias, cumprindo co máximo rigor con todas as medidas sanitarias en canto á protección individual e a limitacións de aforos. Ademais, para garantir o máximo acceso posíbel ao público, poderase seguir pola rede o conxunto da programación a través da canle https://www.youtube.com/user/morreuodemo.
