O Concello de Boiro celebrou este luns a sesión semanal da Comisión de Seguimento da Evolución da COVID-19. Na xuntanza participaron o alcalde, a coordinadora de Servizos Sociais, o coordinador de Protección Civil e o xefe accidental da Policía Local. Entre outros asuntos tratouse a progresiva diminución, esta semana, do número de casos positivos e da incidencia acumulada, logo dos cribados realizados hai 14 días e da entrada en vigor das restricións máximas.
“Este descenso de casos estaba dentro do agardado, é algo moi positivo porque indica que as medidas aplicadas están facendo efecto”, afirmou o rexedor, José Ramón Romero, engadindo que “aínda resta moito por facer para seguir reducindo a curva de contaxios e que poidamos saír do nivel de máximas restricións”. O alcalde tamén fixo un chamamento á poboación: “Quero pedir a toda a cidadanía moita responsabilidade durante o Nadal para saír canto antes desta situación”. Asemade, lembrou que o municipio ten un índice de incidencia acumulado superior a mil, “e debe estar por debaixo de 100 para que se suavicen as restricións”.
En canto ao control e vixilancia da poboación, a Policía Local continúa a facer controis puntuais de entrada e saída do municipio, así como de control xeral das restricións. Na última semana impuxéronse un total de 12 sancións. 5 delas polo uso indebido de máscara, 1 por fumar na rúa sen manter a distancia de seguridade, 5 por incumprir o peche perimetral e 1 por incumprir o confinamento por contacto cun positivo. O número de denuncias efectuadas pola Policía Local dende que se decretou o nivel máximo de restricións ascende a 33.
A Comisión tamén recordou que as actividades culturais e deportivas organizadas polo Concello seguen “aprazadas até novo aviso,” a expensas de como continúe a evolución da situación sanitaria. Tamén as instalacións deportivas, pistas ao aire libre e parques infantís de titularidade municipal estarán pechados “até novo aviso”.
