O BNG da Barbanza reivindica o Día Mundial Contra a Violencia de Xénero baixo o lema A Violencia Machista segue aí tamén en tempos de COVID. O partido sinala que “coa pandemia non se pode baixar a garda e que a loita continúa, xa que o machismo é un virus mortal para as mulleres en todo o mundo”. Nesta batalla, indican as e os nacionalistas, “está en xogo a liberdade das mulleres e o seu dereito a vivir unha vida plena”. Así o confirma a responsábel do BNG na comarca, Elvira Branco: “Temos dereito a ser libres e iguais, a estar no mundo como queiramos sen ter que pagar pola nosa liberdade, mesmo coa vida”.
A pandemia deixou entrever unha realidade: as mulleres realizan a maior parte dos traballos precarios ou invisíbeis, pero que resultan imprescindíbeis para o conxunto da sociedade (caixeiras de supermercado, coidadoras). Este é un dos motivos de denuncia, pois a COVID-19 non oculta a violencia de xénero nin o terrorismo machista que atenta directamente contra a liberdade e contra a vida da metade da poboación.
Na campaña, o BNG pon en valor a “forza” do feminismo galego para conseguir unha un mundo xusto e igualitario e formula diversas medidas que se levarán ao Parlamento Galego. Entre elas destacan unha campaña institucional de sensibilización e un plan específico para a mocidade nos centros escolares, co fin de tratar de forma específica o acoso.
Do mesmo xeito, o partido reclama á Xunta que incorpore nos orzamentos 2021 unha transferencia extraordinaria de 1,5 millóns de euros para aqueles concellos que contan cun Centro de Información á Muller. Ademais, demanda que se destine o 1% do orzamento galego para loitar contra a violencia machista e facilite a atención psicolóxica ás vítimas como un servizo de atención primaria, “sen esquecerse de garantir o funcionamento dos servizos de atención a mulleres en situación de violencia machista no caso dun novo confinamento”.
