O Concello de Boiro, a través da área de Cultura, quere fomentar entre a cidadanía o hábito de incluír libros en inglés entre as súas lecturas habituais. Con este fin, a Biblioteca Municipal vai levar a cabo a partir do mes de decembro un club de lectura de obras publicadas na devandita lingua.
A actividade está destinada a maiores de 18 anos e vaise levar a cabo na Casa da Cultura de Boiro os luns en horario de 19.00 a 20.00 horas. As inscricións son gratuítas e deben facerse na Casa da Cultura de Boiro ou no teléfono 981 84 84 10.
Será unha actividade que complemente e amplíe o xa consolidado Club Lectura local, que comezou o outono con A arte de trobar do escritor galego Santiago Lopo, e con Malaherba de Manuel Jabois. O Club de Lectura é unha iniciativa da Biblioteca para incrementar o pracer da lectura ao compartilo con outras persoas que, unha vez ao mes, se reúnen para comentar o libro lido.
