O venres 27 de novembro Boiro vai acoller un novo espectáculo de Talía Teatro, a partir das 21.00 horas na Casa da Cultura. Trátase de Vida de cans, unha representación destinada ao público adulto cuxas entradas estarán dispoñíbeis o mesmo día do espectáculo a partir das 17.00 horas. Novamente a capacidade do aforo será limitada, co fin de garantir a seguridade sanitaria da cidadanía. Trátase dun texto de Cándido Pazó, que tamén el mesmo dirixe, e en escena Dani Trillo, Toño Casais e Artur Trillo.
O espectáculo recrea para os espectadores a vida de tres actores-cans, tres actores que fan de cans (ou viceversa) sen deixar de ser actores, recluídos nun recinto que lles preparou o seu amo e “demasiado ben tratados, ben atendidos, ben alimentados, ben acariñados… pero recluídos a fin de contas”. Ao longo da obra, irase metendo nas súas vidas, e na dos espectadores, o gume da incerteza sobre o que pode haber fóra do recinto no que viven: a desacougante (e apaixonante) liberdade, o mundo real.
